الوجه الآخر للاستعمار

بتكره الاستعمار ؟..........بتكره الاحتلال والاستيطان واستغلال الغير لمواردك وحقوقك؟؟؟؟؟....اكيد طبعا جاوبت على السؤال ...واكيد كمان اتهمت السؤال بالسذاجة والتخلف ووصفت الاجابة بالبديهية .....ولكن مهلا ...ولنتروى قليلا فى هذه الاجابة فى موضوعية تامة وبعيدا عن المشاعر الوطنية والقومية والكلام الكبير اوى ده....تعالى كده ندقق فى تاريخنا الحديث ....ولاحظ معايا الفرق الغريب بين النصف الاول من القرن العشرين والنصف التاني ...هتلاقى ان النصف الاول كان فى معارضة بجد ..كان فى ناس بتعبر عن رأيها ..بالرغم من انها عارفة انها لا محالة هتتأذي ..كان فى حزب قوى جدا -غير حكومي- اسمه حزب الوفد تتفق او تختلف مع قياداته ولكن يبقي قربه من الناس شفيعا له ...,وكان فى طبعا الاحتلال الانجليزى .....وبس اقف عندك...فلنا هنا وقفة طويلة شوية.... فانا اعتقد ان سمة ارتباط قائم بين الاحتلال وبين ثقافة المعارضة والمقاومة ليس مقاومة الاحتلال فقط بل مقاومة كل ما هو فاسد عموما وهتلاقى كمان ان النخبة فى مصر كانت مهتمة اوى بقضية الجلاء والفساد ايضا
(ملحوظة :انا مرجعيتى فى ذلك بعض القراءات البسيطة والسمع عن تاريخ مصر من خلال الاعلام او ممن حولى )
وفى الفترة ديه قامت ثورة 19 ونشأ تجمع الاخوان المسلمين وغير ذلك من الاحداث التى يظهر من خلالها وجود فكر المعارضة ورفض الفساد وعدم وجود فكر التسليم للامر الواقع...
لأ ده فى حاجة تانية مهمة اوى ظهرت برده فى الوقت ده ,,وهو ما يسمي بتنظيم الضباط الاحرار .....وهنا خلى بالك من حاجة مهمة اوي ..ان لما يكون فى ناس بتفكر فى مصلحة البلد -من وجهة نظرهم- وبتخطط كمان لكده ...ده معناه وجود وعي كبير لديهم وايمان قوى بانهم يقدروا يعملوا حاجة ووجود هذه النوعية من البشر يدل على وجود مجتمع على قدر ما من الوعى وهذا القدر ليس باليسير ,,,وحط بقى عقلية الناس ديه -بصرف النظر عن اتفاقك او اختلافك معهم- جنب عقلية الناس دلوقتى هتتلاقى ان ثقافة السلبية والضعف والاستهانة بقدرات النفس بل والحط منها وثقافة (انا هاغير الكون) هى المسيطرة وكلها طبعا مشاعر تكبل الارادة.............
وبعد البُقين الجامدين دول نرجع بقى للثورة....هذا التجمع اخذ يخطط لما يخطط له وجمعتهم فكرة وهدف واحد وخلينا نتجاوز الاحداث لحد ما اصبح لديهم مقاليد امور البلد ...ماشى لحد كده جميل اوى ومفيش مشكلة ....لكن بص بقى للى مش جميل خالص الحقيقة ....بص للى بعد 52.......هو ايه اللى حصل ...هو الوعي راح فين ...وهل تغييب عقول الناس بهذا الشكل تم عمدا ام لا وهل السبب فى غياب ثقافة المعارضة يرجع فقط للخوف من التعبير عن الرأى فى ايام حكم الثورة !!!!!! اعتقد ان ده تسطيح للامور شوية ,لان معنى كده ان الثورة زرعت خوف وقهر اكتر من اللى زرعه الاحتلال ...لان لو الخوف هو السبب الوحيد او حتى الرئيسي مكنتش الثورة قامت اصلا .....لان اكيد كان فى خوف وقهر وظلم ايام الاحتلال.... ولذلك انا ازعم ان سمة ارتباط وثيق بين غياب الوعي وثقافة المعارضة وبين غياب الاستعمار .....فالاستعمار من وجهة نظرى ...بص للكلمة الجامدة اوى ديه ...يثري الوعي ....اه تصدق ....الاستعمار يثري الوعي ويجعل الشعب له قضية قومية ويكون عبئاً وهماً على الجميع ويجعله مجتمع ناقد للامور ومتشوق باستمرار للتغييروبالتالى تنشأ ارادة حقيقة وغير محدودة وللاسف تخمد تلك الحماسة والارادة بانتهاء الاستعمار وكأن الشعب فاكر ان الاحتلال هو سبب كل المشاكل ولما يمشي ..خلاص كل حاجة هتبقى حلوة......
وما اود ان اقوله ان للاسعتمار جانب منير بل ورائع -وانا عارفة انى استفذيتك بما فيه الكفاية- بس هقولك على حاجة... اعمل مقارنة بسيطة بين القضايا التى تشغل شبابنا وبين تلك التى تشغل شباب فلسطين وجنوب لبنان ويمكن ساعتها تغفر للاستعمار سواده وظلمته ,,,,
ويبقي شيء اخير ....انا قولتلك فى الاول اننا هنحاول نرد على السؤال بموضوعية بعيدا عن المشاعر....و لكن انّى للمشاعر ان تتخلى عن طبيعتها الحشَريَّة وانّي لها ان تكف عن ملاحقتنا بكراهية المستعمر وانّي لنا ان نفصل بين مشاعرنا وتفكيرنا بهذه الآلية القاسية وكيف ننظر للامور بالمنطق فقط والسؤال الذى اريد اجابته حقا:لماذا تندفع ارادتنا وتتحرك مشاعرنا ضد المستعمر فقط ...لماذا لا تكون ضد كل فاسد يغتصب حقوقنا ليلاً نهاراً والطامة الكبرى انه من ذويينا ...أليس أدعي بنا ان ننفعل من اجل ذلك يعنى لمّا تيجى من القريب المفروض انها تكون اصعب!!

فكر تأمينى عالى من اجل كل غالى

فى يوم من الايام سرحت ...وسرحت.....وسرحت ... الى ان اتتنى "حتة" فكرة انما ايه " لوز" ...حتة ...حتة ايه ديه كبيرة اوى اه طبعا امال ايه هو احنا بنهرج ...وهى فكرة تهدف بالاساس للتقليل من استفزاز المواطن ...وهو طبعا مستفز من ان حرارة الجو الطفيفة لكن طبعا فى ظل التكييف الموجود فى المواصلات والشغل -و طبعا اللى فيه اتنين تلاتة منه فى البيت -اذن فلا بأس من القليل من الاستفزاز مع بعض من النقطة التى نشعر بأعراضها من حين لآخر خصوصا -وهنا محور الفكرة ا لجامدة اوي-عندما يمر موكب احدهم وما اكثر احدهم هذا وبات لا ينطبق على الرئيس فقط بل احدهم هذه تمتد للحبايب كلهم,,,,ما علينا نرجع للفكرة الجامدة :بنشوف كلنا طبعا ياولاد مواكب المسؤلين الموقرين ترى فيها صف سيارات طويل واسود -واللى عادة بتكون حتت مرسيدس على شوية بي ام- ماشى مقلناش حاجة فلوسكم برده وانتوا احرار,, لكن انا اخشي عليكم العيون الحاقدة ,,من النفوس المريضة التى لم تستوعب ان الدنيا ارزاق,,,واتقاءا لنظرة هؤلاء الطامعين فى خيرات البلد "وقال ايه"يريدوا ارساء مبادىء العدل الاجتماعي وتكافؤ الفرص "مش بس كده "انهم يريدوا اايضا الشفافية ومن اين لك هذا وكل الكلام اللطيف ده شفت يآخى بجاحة اكتر من كده تبقي البلد بلدكوا ودول عايزين يبصولكوا فى الكام اهيف .....ما علينا وانا لا اريد ان اطيل عليك لكن "بشوقك "لتعرف مدي اهمية الفكرة الفولاذية -وكله عشانك ياكبير- واليك الآن الفكرة بعد كل هذا الشرح للمبررات :ان تأتي ب3عربيات من نفس النوع-لزوم التمويه يعنى - مرسيدس او بي ام - اه امال ايه امال فيورا مثلا- ويحوط ال3 -اللى ربنا هيحرسهم قبل اى حاجة - 4لوريهات من4 اتجاهات ولمزيد من التأمين نلحق ال4لوريهات بمقطورة ,وبكده تبقى قفلت ,فمن هذا الاحمق الذي سيفكر فى ايذائك , ولست بالطبع عن السلاح اتكلم فهذا مفروغ منه , وانما بالنظرة ا لحاقدة فمن سيفكر انه "يِلوِح"رمش عينه حتى من اجل "رمي"نظرة من دول اعتقادا منه انها ستأتى بعائد ...صدقنى حتي ديه مش هتيجى على باله. ياسلام ,,,فكر تأمينى عالى جدا وبعدين الموضوع كله مزايا :

اولا : سوف لا نتعرض لرؤياكم البتة -قال يعنى قبل كده كنا بنشوفهم -ولكن ان كان هناك احتمال واحد فى المائه ان نراكم فى ظل الوضع الراهن فانه فى حالة تطبيق هذه الفكرة الفعَّالة سينسف هذا الواحد فى المائة اليتيم ,وحتى ان فكرت تتعطف علينا وتطلع ايدك فى مرةعشان "تبيبي" تعمل باي يعنى, هتلاقى فى وشك سائق اللورى المتين وسوف لا يعبأ "بالباياية الحنونة"نظرا لانهماكه فى العملية التأمينية ,,,

ثانيا : قد يتصور البعض ان انا اقترحت هذه الفكرة الحقيرة من اجل توفير النفقات والقصة ديه,,,, احب اطمنكوا ان الفلوس هتدفع هتدفع لان هذه السيارات ليست بالرخيصة ونشتريها مرسيدس برده اه ايه المشكلة وهذه الفكرة مختصة بالجانب الاستفزازى فقط للبسطاء ,وما اكثرهم, سيعتقدوا ان المسئول استعان بهذه العربات توفيرا للنفقات,اهو نوع من امتصاص الاستفزاز وهم طبعا ,البسطاء يعنى,سيعتقدوا انها رخيصة نظرا لشكلها الحقير اوى

ثالثا :الفكرة وما تتضمنه من حس تأمينى عالى تضمن للمسئول الراحة والطمأنينة حتى يتمكن من حل مشكلات مصر العويصة فى جو من السكينة والهدوء حيث الدبابات التى تحيطه من كل جانب -اللوريهات يعنى- ساعتها هيخاف من ايه مثلا ,,,,,
بس تبقى مصيبة لو الفكرة عجبتهم ولمزيد من الراحة والطمأنينة يأمن الأسرة كلها ,,,,,,,,,

الفكر الجديد والعبور للمستقبل

انا زهأت وطفشت ............خلاص ده فعلا الاخر ومش هينفع استحمل اكتر من كده ..........اذا فضلت شويه كمان يبقى اكيد هاكون فى دايرة الاحباط والاستسلام وخضوع للواقع وللعيشة العجب اللى احنا عايشينها -شوفت الكلمتين الجامدين دول عجبتى اوى خضوع للواقع ديه - انا مش معقول افضل فى ساقية القرف والخنقة والتهريج والبرود ,,,,,,,,,,,,,,,

قرائى الاعزاء طبعا مش عارفين اى حاجة ولا فاهمين اى حاجة دلوقت ....واليكم توضيح جرعة التمرد اللى فاتت ديه :

اتحدث عن عملى ياسادة اتحدث عن العقول المتحجرة والحيطان التى اتعامل معها , اتحدث عن المسلمات التى نعيش فيها بمعنى ان اى حد عايز يعمل اى حاجة يتقاله هذه الكلمة المعجبانى :,, احنا بقالنا سنين بنعمل كده,,
ده على اساس ان اللى انتوا بتعملوه ده اكيد ولزمن ولابد انه يكون صح وان الصح ده مسلمات غير قابلة للتغيير,
واعتقد انى اذا فضلت فيها اكتر من كده ,,,اعتقد ان هذا الحوار ده هيدور بينى وبين الدفعة اللى هتيحى بعدي تحديدا ب 5 سنين عشان اكون لحقت اتشبع بالاحباط اللى على ابوه:
هاتيجى الزهرة التى لم تتدبل بعد وتسألنى :هو ماينفعش نعمل كذا وكذا ....
ارد انا بقر بعد ان اصبحت وردة دبلت :انتى قصدك يعنى ان احنا نعمل كذا وكذا (مانا لازم استفسر برده عشان كلامها غير واضح )
الوردة:اه يادكتور ايه رأيك ,
انا :والله يابنتى (بنتى ديه طبعا فى الاول بس لو طولت عليّا شويه هيبقى فى كلام تانى قال بنتي قال)اللى انتى بتقوليه مظبوط (وافتكر الايام الخوالى ايييييه ايام ما كنت انا مكانها واستحضر ساعتها كل اللى اتقالى عشان انتقى ابلغ ما قيل واجمله )بس لو كنتى عايزة تعملى حاجة يبقي كذا واحدة بس ( امال كذا وكذا يعنى ,ديه هاتقرفنا بقى ولا ايه ) انا برده اقدم منك هنا وادري منك بظروف الشغل !!!!!!!!!!।
هى :ايوه طبعا يادكتور انا بس باقترح ,,
انا :ايوة اقترحي براحتك وانا سعيدة اوى بان قلبك على الشغل(سعيدة جدا) لكن فى نفس الوقت انا اللى ليه الكلمة الاخيرة(انا هتكلم معاها المرة ديه بالراحة انما لو كررتها ,,هعمل معاها ايه ديه ,ديه شكلها كده بتاعة وش ومش هتجيبها على خير,هى هتعمل فيها دكتورة عليا بنت امبارح ديه )
هى :ايوة طبعا حضرتك اكتر منى خبرة
انا :وادام شويه هتعرفى ان اللى انا بقولهولك ده الاقرب للصح وعشان اكون صادقة معاكي هو الاقرب للواقع وبعدين انا عايزة اقولك حاجة,,,,,, احنا بقالنا سنين شغالين كده !!!!!!!!!!!!!!!!!!!!!!!!!

وانا قعدت اوصف ما يعتمل فى صدري من جراء محادثة هذه اليافعة اللى كلها تطلعات للدنيا ولم اصف ما يعتمل فى صدرها رغم انه الكثير والكثير وده لانى مش بحب اكرر الكلام تانى لانك ببساطة ممكن ترجع لاول المقالة....... لان الحمد لله ال5 سنين لسه معدوش وان شاء الله مش هيعدوا ,,,
ملحوظة :مش عارفة ليه وانا بكتب المقالة ديه افتكرت بشدة الفكر الجديد والعبور للمستقبل ,,,اصل الظاهر ان احنا بنطبق الفكر الجديد من زمان ده غير ان احنا عبرنا المستقبل من زمان عشان كده مفيش احتياج اصلا ان احنا نتطور تانى يعنى بالعقل كده هنروح فين بعد العبور,,,,

كله يوسع يابني ....المصري عايز يعدي

انا مش فاهمة الناس زعلانه اوى كده ليه من رفع سعر البنزين وبعدين هو رفع اد ايه يعنى 40 قرش ايه يعنى ولا انتوا بقى شعب غاوي قلق واضرابات ووش اه طبعا اصل اللى انتوا ممكن تكونوا مش عارفينه ان احنا المصريين ,يعنى قلق ...يعنى المعارضة ...يعنى الاضرابات والاعتصامات مع حبة مظاهرات ....يعنى مفيش ايها حد يقدر يضحك علينا ..............وسمعنى سلام كبير اوي ................بس اللى انتوا اكيد عارفينه ان احنا المصريين ......يعنى الصبر ...ومش اى صبر ...ده صبر الصبايا المتصبصبين ,



فى حاجة غريبة شويتن تلاتة كده,,, الاجرة فى بعض المواصلات زادت 40قرش برده ده على اساس ان فى لتر لكل مواطن!!!!!!!!!!!!!!!

ليه تعيش وحش لما ممكن تعيش اوحش

ده كان رد على سؤال ا محمد هشام برده ,اصل السؤال عجبنى اوي وفتح التريأة على اخرها واللى بتكتب دلوقتى ديه تعشق التريأة,,واليك الاجابة:

بالنسبة للي بيقرا البوست ده من غير ما يكون قرأ البوست اللي فات طبعا مش عارف السؤال بس انا مش هاعد اكتبه كتير سيتك ممكن ترجع للبوست اللى فات وتقرا السؤال بس وترجع لهنا تانى,,,,,
هو ان احنا حاسين ان الوضع اللى احنا فيه ده قدرنا ............بمعنى ان اللى حاصل هو اللى المفروض يحصل ...-بمعنى ايه برده ...-هو انتي كده وضحتى- طيب خلاص خلاص انا هاحكى موقف يوضح اللى عايزة اقوله:ساعة انتخابات الرئاسة كنت بتكلم انا واصحابى على مين اللى هننتخبه -على اعتبار ان احنا كنا عارفينهم كلهم حتى بالأمارة كانوا مرشحين كتير وبالأمارة كان الحزب الوطنى داخل الانتخابات بمرشح ولمزيد من الامارة والدليل القاطع على مراقبتنا للمرشحين ساعتها وحرصنا علي ان احنا نختار الرئيس القادم بعناية ...كان المرشح ده اسمه محمد حسنى مبارك..شفت انا فاكرة اسمه الثلاثى كمان ...طبعا امال ايه ده الرئيس القادم,انت بتتكلم فى ايه.........قاريء عزيز هيقولى ... طيب ممكن دلوقتى نرجع لموضوعنا بدل العطلة والكلام الفاضى اللى ملوش لازمة ده اللى قلب علينا المواجع......اتنهد واقوله...والله يابنى معاك حق ..خلينا فى السؤال الجامد اللى سائله محمد هشام(المحرر)-جامد هنا تعبير ليس بمجازى ,انما واقعي ومادى لانه سؤال شديد (الجمودية) على النفس لدرجة انه بيوجع-
واعتقد ان دلوقتى القاريء العزيز اللى كان متأفأف من شوية من خروجنا عن الموضوع ساب المقالة خالص يعنى انا من ساعة ما وعدته انى هدخل فى الموضوع لحد هنا منفذتش وعدى -وده ان كان فى قراء اصلا على اساس ان المحرر استحمل المقالة للاخر ومش كده وبس ده هينشرها كمان ..................ودلوقى وبجد بقى هدخل فى الموضوع - ده ان كان فى حد لسه بيقرأ المقالة- تصدق ان انا رخمة اوى لدرجة انى زهأت من نفسي ,,,,,,,,نرجع ليا انا واصحابى,, فكنت بقولهم انا هختار اى حد الا مبارك فواحدة صحبتى ردت عليا رد لم انساه وعلق معايا جدا هو انها هتختار مبارك و مش علشان هى مقتنعه بيه॥لأ طبعا ولا عشان انجازاته..لأتين طبعا انما علشان اللى مترشحين غيره ممكن يبقوا اسوأ منه يبقى اذن اللى نعرفه احسن من اللى منعرفوش ......وهنا انتهى كلام صحبتى ,وانتهى معه الامل فى اي حاجة ,, خلاص ضلمت يعنى ولا ايه هيفضل الوضع كده علطول وانا رديت عليها رد بسيط احنا خلاص عرفنا مبارك وادارته شكلها ايه وعرفنا انه نظام فاشل واكيد اللى منفعش يتصلح فى 25سنة مش هيتصلح فى الخمس سنين اللى جايين ....يعني من الاخر نحن لدينا ( يقين )ان الوضع القادم هيكون سيء فى ظل الحزب الوطنى وفى نفس الوقت احنا منعرفش المرشحين الاخرين ادارتهم للبلد هتكون اذاي ...اذن احنا لدينا احتمال ان الوضع يكون سيء ولدينا احتمال ايضا ان الوضع يكون كويس ان شاء الله فى ظل احزاب اخري.......يعنى من الاخر لو مبارك كسب هيكون 100%الوضع سيء ولو مرشح تانى كسب هيكون 50% الوضع سيء!!!!!!!!!!!!!!!!!!!!!!!!!!!! وباعمال العقل ولو لدقيقة كان الواحد عرف هيختار مين ؟؟؟؟؟؟؟؟؟؟؟؟؟؟؟؟؟؟؟؟؟؟؟؟

الحزب الوطنى طبعا وديه عايزة كلام ..اعمالا بالمثل الشهييييييييير جدا:ليه تعيش كويس اما ممكن تعيش مش كويس ,,,,او المثل الأشهر :ليه تعيش حلو اما ممكن تعيش وحش.....ولو واحد فقري شويه هيكون سمع المثل ده على النحو الاتى:ليه تعيش وحش اما ممكن تعيش اوحش بس احنا فعلا بنتعامل مع كتير من المواقف اللى بتعدى علينا بكتييييير من السلببية انطلاقا من احساسنا بان القدر كاتبلنا كده.
ملحوظة لما رحت علشان انتخب لم اجد اسمى بالسجلات ...تقولش كانوا عارفين.

ابدأ بنفسك ومن تعول

انا هانزل مش هلاقى مواصلات ولولقيت ورحت الشغل هيكون مقفول ولو لقيته مفتوح هدخل ومش هلاقى حد ولو لقيت يبقى ........... هي الفرخة اللى جت الاول ولا البيضة:

فى مره محرر بريد القراء فى الدستور ا هشام محمد عبيه سأل سؤال :لماذا توقف رد فعل المصريون تجاه زيادة الاسعار المجنونة عند كثير من البرطمة وكثير من الحزن وكثير من الصمت وما رد الفعل الذى كان ينبغي ان يقوموا به؟ السؤال عجبنى ,واليكم الاجابة من وجهة نظري المتواضعة :
انا مش هتكلم كتير عن الايجابية واللى المفروض نعمله والقصة ديه, لان فى رأيي ان السبب ببساطة ان احنا نسينا ان الرسول قال(ص)-حديث فيما معناه-ابدأ بنفسك ومن تعول ,, وانا عايزة احكى موقف حصل معايا ساعة لما سمعنا عن اضراب 6 ابريل ,كان قبليها بكذا يوم وانا واصحابى فى الشغل اتكلمنا طبعا عن الموضوع ده وناس كتييير اوى فى الشركة كانوا بيسألوا -بالذات يوم السبت5 ابريل-بكرة فى شغل,,,,والحقيقة ان ناس كتييير اوى كانت بتسأل عشان متورطتش نفسها بمعنى لما تحصل مشكلة -وربنا ما يجيب مشاكل بما اننا فى بلد الديمقراطية وحرية التعبير ايه المشكلة يعنى لما نعمل اضراب - يقولوا ساعتها اصل احنا سألنا فلان وقال كذا ......لدرجة ان فى ناس بتسأل عن اذا كان اليوم ده اجازة ولا لأ على اساس برده يقولوا ان فلان قال ان اليوم ده اجازة....وكل ده طبعا عشان يخلوا مسئوليتهم ويرموها على فلان-الظاهر انهم بيكرهوا فلان اوى والظاهر برده انه مشاغب -بس هى المشكلة دلوقتى اذا كانت الحكومة شدت فلان ساعتها وحبوا بعد كده يعملوا اضراب هيشيلوها لمييييين .............لميييين............ لميييييين اه لعلان اكيد ,,وان جيتوا للحق ان كان فلان ولا علان هما الاتنين مكروهين اوى _-انا فى الشركة وعارفة - الغريب ان كل واحد كان عنده امل ان كل الناس-عداه هو فقط-هيعملوا اضراب وبالتالى البنى ادم ده هييجى فى باله كده :هانزل من البيت هالاقى الشوارع فاضية والعربيات كلها مركونة ومفيش مواصلات- اكيد يعنى- وعربيات الشركة اكيد مش هتيجى- ده اساسي طبعا- على اساس ان كل السواقين ايجابيين وبالتالى هافضل واقف لحد ما أتأخر على الشغل وعلى اسوأ الاحوال اذا لقيت اى تاكسى كده وحيد شريد هركبه واروح الشركة اكيد مش هلاقى الباب مفتوح لان طبعا الناس اللى بيفتحوا الباب غايبين علشان الاضراب -امال يعني هييجوا ويبوظواالاضراب -والحقيقة ان هذا المواطن العجيب نسى حاجة مهمة جدا ان السواقين جه فى بالهم التفكير ده :انا ها طلع بالعربية واروح محطة البزين اكيد مش هلاقى بنزين ولو لقيت-وده احتمال ضعيف جدا - العربية هتبوظ منى فى السكة ومش هلاقى ولا ميكانيكى فاتح ولو لقيت حد عرف يصلحها وحصل انى رحت الشركة اكيد مش هلاقى الشركة مفتوحة اصلا.....والحقيقة ان هذا الموطن الأعجب نسى ان الناس اللى بيفتحوا الشركة هيجى فى بالهم كده:انا هاروح وافتح عادي خالص واستنى الموظفين
لحد السعة 11- واللى انت ما تعرفهوش ان اللساعة 11 فى الشركة عندى متأخر جدا-وبعد كده هاقفل الشركة وامشى عشان مفيش حد خالص جه والحقيقة ان هذا المواطن مش هقدر اقول عليه لا العجيب ولا الاعجب وانما ممكن يكون معجبانى......

ملحوظة صغيرة : هو ليه كلنا كنا فاكرين ان كلنا هنغيب اليوم ده ما عدانا!!!!!!!!!!!!!! ليه دايما مستنين حد تانى اللى يبدأ وسبحان الله كلنا نتكلم عن الشعب المصرى على انه شعب سلبى وبيستحمل القهر والفقر والذل و..و... ويوصل بينا الامر ان احنا نقول مثلا شعب يستاهل ان ياخد فوق دماغه طول ما هو ساكت هياخد اكتر واكتر........وطبعا اللى بيتكلم ده مواطن مكافحستانى اصيل بيحب بلده اوى وايجابى بقى مقولكش ,مش قادرة اوصفلك هو عمل ايه عشان بلده ......والحقيقة ان انا فعلا مش هاقدر اوصف!!!!!!!!!!!!!!!!!!!!!والسؤال دلوقتى

هو مين مستنى ايه عشان يعمل حاجة؟؟؟؟؟؟

ملحوظة اصغر: انا لا ابرأ نفسى ,.......

مشهد بريء من زمن الفن البطيء

فى البوست ده هنرجع لزمان و يا عينى على زمان وايام زمان والناس زمان والعيشة زمان وايييييييييه ...بس كله كوم وسينما زمان حاجة تانيه دنيا تانيه ويُقال ان الناس زمان مكنوش عايشين ذى ما بيصوروا فى الافلام خالص...وانا من كتر اعجابى الشديد بسينما زمان فكرت انى اعمل باب عن هذه السينما,,, سينما القصور والفيلات فيها عادي جدا سينما الخمرا والبارات فيها عادي جدا جدا واشياء تانى اعجب واعجب ولك ان تتخيل ان عماد حمدي كان خارب الدنيا وكان -اسمع ديه بقى-فتى الشاشة الاول يعنى البنات كان مخها فين ...مش عارفة وبعدين مكنش فى سلام عليكوا او صباح الخير لا لا لا مفيش الكلام ده تلاقى سعيدة نهارك سعيد .... ,المهم خلينا المره ديه نوصف مشهد رومانسي وبما ان الموضوع ده غزير فأكيد هنرجعله تانى.........

البطلة قاعدة بتلقائية على النجيلة فى الجُنينة تحت الشجرة وتكون سرحانة ودلوقتى zoominعليها تتنهد ووشها سرحان على سهتنة شوية وتبص فى الساعة ,والبطل جاي من وراها ,وتكون مخارج الفاظه واضحة ولمزيد من التخيل استحضر عماد حمدي فى ذهنك حيث البطء والرومانسية المفرطة .....

هو: سعيدة ,,,,,,,اتأخرت عليكي

هى : ياااااااااااااااااااه اوي ,,,,,,,,,,,,,بُعدك عشر دقايق عدّى علىَّ سنة بحالها

هو: (يتكلم وهو بيعد جنبها على النجلية فى الضُليلة )ياه للدرجادي اتأخرت اوعي يا روحي تكونى حسيتى بملل وعلى العموم أنا متأسف

هي: لأ ........................لأ(المسافة بين اللأتين بعيدة شويتن اهه عقبال ما قالتها ...ما هو بطيء بقى) ما يهمكش يا نور العين ده انا لو اعدت مستنياك العمر كله مش هزهأ أدام فى الاخر هتجينى ....تأكد انى هافضل دايما مستنياك وهاكون دايما فى انتظارك

هو: وده برده كان عشمى فيكى وتأكدى انى جوايا نفس الشعور ............عينيكى النهارده فيها حاجة جميلة والجو كمان النهارده لطيف اوي ...وفستانك شيك خالص .....(يده)انا شاعر ان القمر نزل من السما من بين النجوم والسحاب والغيوم وقاعد معايا دلوقتى ياترى شعورى ده صحيح(يبصلها ويبتسم ابتسامة سمجة)

هى: متكسفنيش بقى وبعدين وياك

هو: لأ صحيح انا حاسس ان الدنيا مش سايعانى من الفرحة .......ياترى ياهالتري انتى كمان شاعره بكده

ملحوظة من قبل الكاتب وخروج مؤقت عن السرد الممتع للمشهد :النقط اللى بين الكلام تعنى وقفة للفنان بين الكلام عند الجملة اللتى تسبق النقط।والآن عودة للمشهد ,

هى: (تضحك وتبص فى الارض فى الناحية التانية اللى هو مش قاعد فيها )وبعدين وياك ...الله بقى

هو: صارحينى من فضلك ....انا حابب انى اعرف هل مشاعرك وعوطفك واحاسيسك ناحيتى انا فعلا ولا فى حد تاني فى حياتك ذىممدوح ابن طنط ناظلى مثلا او مدحت ابن خالتك انا مش عايز اعيش فى اوهام وبعد كده الاقى انى كنت مخدوع واصحى على كابوس انك مش ليه

هى: انا هقولك على شيء كنت شيلاه فى قلبى وحطاه جوا نن عيونى وحبساه جوا ضلوعى ...ان مش مشاعري وعواطفى واحاسيسي بس هى اللى ناحيتك لأ اوعي تفتكر كده او مخك يصورلك كده او حتى خيالك يروح لكده (لاحظ الفروق الجامده)لأ تبقى غلطان وتبقى لسه معرفتنيش كويس,,,لان حياتى ....وعمري .... وذكرياتي ...وماضيه.... وحتى اللى جاي كمان من عمري كله ليك ,واتمني (تنهيدة تقيلة اوى بقى غير اللى كانت من شويه ديه خالص)اتمني من كل قلبى ان اعيش بقية عمري معاك

هو: صحيح

................................!!!!!!!!!!!!!!!!!!!!!!!!!!!!!......لا يوجد ارسال والحقيقة انه لا يوجد كهربا فى التليفزيون اصلا لانى طفيت التليفزيون خالص لضمان سرعة التخلص من الاشواق الجامده ديه عشان كان ممكن اغيّر القناة الاقى فيلم لعبد الوهاب مثلا وهنا الطامة الكبري وهنا انا بتكلم بجد بقى انا فعلا مكنتش هاستحمل خالص ولقطات عابرة هي مدي معرفتى لاي فيلم لعبد الوهاب ..............الغريب يقولك ايه بقى ........................زمن الفن الجميل ...........ويقولك ايه برده :قول للزمان ارجع يازمان ,,,,,,,,,,,يرجع ليه ان شاء الله ,,,,,,اه دلوقتى احنا جالنا الضغط من العيشة ومن(سرعتها) بس زمان كان هيجى الشلل نصفى ورباعى ورعّاش كمان ده غير ان المرارة اللى هتتشال

عذراً ايها القراء الاعزاء المفروض كنتوا تتحولوا فى هذا البوست الى مستمعين (اعزاء برده ) لايضاح صوت الابطال لان الحقيقة ده جانب مهم جدا فى التخيل لان -ومش عارفه ليه- كان الصوت زمان فيه خنف شوية على رزانة غريبة ...وده مش تريأة على خلقة ربنا خالص لان الغريب فى الموضوع ان اغلبهم كانوا كده وده اكيد من المخرج لان مش ممكن زمان كلهم كان عندهم مشكلة فى جين الحنجرة